Loading...
Loading...
අද මං කතා කරන්න යන්නෙ ත්‍රාසජනක අත්දැකීම් විඳීමට දැඩි ඇල්මක් දක්වන සැවොම වාගේ ප්‍රිය කරන තවත් එක් මාතෘකාවක් ගැනයි. ඒ ඇබ්සෙයිලිං (Abseiling) එහෙමත් නැත්නම් රැප්ලිං(Rappelling) ගැනයි. මෙය වික්‍රමාන්විත, විශ්මයජනක, ස්වභාවික සෞන්දර්යය සමඟ මුසු වූ විනෝදජනක ක්‍රියාකාරකමකි.
Abseiling කිරීමේදී විශේෂයෙන්ම කඹයක් සහ ඊට අදාල සුවිශේෂී උපකරණ කිහිපයක් භාවිතයෙන් සිරස් හෝ ආසන්න වශයෙන් සිරස් වූ මතුපිටක ඉහල සිට පහළට බැසීම සිදුකරයි. මෙය ඉතා ත්‍රාසජනක අත්දැකීමක් වන අතර දිය ඇලි ඇබ්සෙයිලිං (Waterfall abseiling) එය තවත් එක් තලයකට ඔසවා තබයි. මේම ලිපිය හරහා අප abseiling ලෝකයට ඇතුලුවී waterfall abseiling හී ද අද්විතීය චමත්කාරය සමඟ මුසු වූ අභියෝග ගවේෂණය කරන්නටයි මේ සූදානම.
අපි ප්‍රථමයෙන්ම සොයා බලමු කුමක්ද මේ abseiling කියන්නෙ කියලා. Abseiling යනු ත්‍රාසජනක අත්දැකීම් විඳීමෙහිලා ලොල්වූවන් ඔවුන්ගේ ශාරීරික සහ මානසික සීමාවන් හට අභියෝගයක් එල්ල කිරීමට උත්සාහ කරන එලිමහන් වික්‍රමාන්විතයන් අතුරින් මේ වන විට බොහෝ දෙනා අතර ජනප්‍රියත්වයට පත් වෙමින් තිබෙන්නා වූ ක්‍රියාකාරකමකි. එය උස් ප්‍රපාතයක සිට පහළට බැසීමක් ලෙසට හෝ ගල්පවුරක් හෝ ගොඩනැගිල්ලක් හරහා පහළට බැසීමක් ලෙසටද වියහැක. මේ සඳහා නිපුණත්වය, තාක්ෂණය සහ නිසි ආරක්ෂිත උපක්‍රමයන්ගෙන් සන්නද්ධ වූ පිරිසක් අවශ්‍ය වේ.
Abseiling යනු ශතවර්ෂ ගණනාවක් පැරණි ක්‍රියාකාරමක් වන අතර කඳුනගින්නන් සඳහා අත්‍යවශ්‍ය කුසලතාවයකි. අද වන විට එය විනෝදාස්වාදයක් බවට පරිවර්තනය වී ඇති අතර සෑම තරාතිරමකම ත්‍රාසය සොයන්නන් ආකර්ෂණය කිරීමට සමත් වී තිබේ.
මෙහි පළමු පියවර වන්නෙ පටි, හිස්වැසුම් සහ වෙනත් ආරක්ෂිත ආම්පන්න මගින් ඔබේ ආරක්ෂාව තහවුරු කිරීමයි. Abseiling සඳහා යොදාගන්නා උපකරණ අතර; පටි (harness), ලණු (ropes), කැරබිනර් (carabiners) සහ බැසීම් (descenders) ඇතුලත් වේ. මෙම මෙවලම් මගින් abseiling කරන්නන්ට abseiling අතරතුරේදී ඔවුන්ගේ බැසීමේ වේගය පාලනය කිරීමටත් ක්‍රියාකාරකම පුරාවටම ආරක්ෂාව සහ සුවපහසුව පවත්වාගැනීමටත් හැකියාව සලසයි. මෙම ක්‍රියාවලිය ප්‍රීතිමත් සහ ආරක්ෂිත අත්දැකීමක් බවට සහතික කිරීම සඳහා මනා පුහුණුවකින් යුත් මඟපෙන්වීමක් අත්‍යවශ්‍ය වේ.
මේ සඳහා abseiling කරන්නා තුල හොඳ අවධානයක්, සමබරතාවයක් සහ නිරවද්‍ය චලනයක් තිබීම අවශ්‍ය වේ. මෙම ක්‍රියාකාරකමේ සුන්දරත්වය රඳා පවතින්නේ නිස්කලංක, විශ්මයජනක පරිසරයක් තුල සිත්ඇදගන්නා දසුන් මෙන්ම භයංකර සිරස් බාධකයන් ජය ගනිමින් පහළට බැසයන විට දී ය.
Waterfall abseiling, abseiling හි නව මානයක් නිරාවරණය කිරීමට සමත් වෙයි. එය abseiling ලෝලීන් හට නවමු අත්දැකීමක් එක් කරයි. මෙය දිය ඇල්ලක පහතට බැස යන සිරස් තලයක් ඔස්සේ ඉහළ සිට පහළට දිය ඇල්ලේ සුන්දරත්වය සහ එයින් විහිදෙන ජල දහරේ සිසිල් පහස විඳිමින් සිදුකරන ක්‍රියාකාරකමකි.
සාමාන්‍ය abseiling කිරීම හා සසඳන විට දියඇලි abseiling කිරීම සඳහා අමතර මට්ටමේ සුදුසුකමක් සහ ප්‍රවේශමක් අවශ්‍ය වේ. ලිස්සනසුලු පාෂාණ, ජල ප්‍රවාහය මෙය වඩාත් අභියෝගාත්මක ක්‍රියාකාරකමක් බවට පරිවර්තනය කරයි.
මෙම ක්‍රියාකාරකම ඇරඹීම බොහෝ විට සිදුවන්නේ ස්වභාව සෞන්දර්යයෙන් ඔපවත් වූ මනරම් ස්ථානයකින් වේ. ස්වභාවධර්මය සමඟ ඇති මෙම අද්විතීය සම්බන්ධතාව පරිසරය සහ එය සංරක්ෂණ කිරීමේ අවශ්‍යතාව සඳහා ගැඹුරු ඇගයීමක් ද ඇති කළ හැකිය. කඳු බෑවුම දිගේ ගලා බසින ජලය ගල් කුලු සමඟ ගැටී ඉතා අලංකාර මීදුමක් මවන අතර ගොරවන්නාක් මෙන් දිය ඇල්ලේ ජල කඳ ඇදහැලෙන ශබ්දය abseiling කරන්නන් වැලඳගනිමින් ත්‍රාසජනක මෙන්ම ප්‍රීතිමත් අත්දැකීමක් නිර්මාණය කරයි. මෙම අත්දැකීම abseiling කරන්නන්ගේ ආත්මයන් තුලට ඉන්ද්‍රජාලික හැඟීම් කාවැද්දවීමට සමත් වේ.
දිය ඇලි අභිබවා ගවේෂණ චාරිකාවක යෙදෙන විට පිලිගත් ආයතනයක් හෝ මනා පුහුණුවකින් යුත් මාර්ගෝපදේශකත්වයක් තෝරාගැනීම ඉතා වැදගත් වේ. මොවුන්ට භූමිය, කාලගුණික තත්ත්වයන් සහ වෙනත් අවධානම් පිළිබඳව ගැඹුරු අවබෝධයක් ඇති අතර සියලුම සහභාගිවන්නන් සඳහා ආරක්ෂිත සහ විනෝදජනක අත්දැකීමක් සහතික කෙරේ.
අවසාන වශයෙන් Abseiling හෝ Waterfall Abseiling ත්‍රාසජනක අත්දැකීම් විඳීමට ලෝල්වූවන් හට ස්වභාවධර්මයේ අරුමපුදුම දේවල ගිලී සිට ශාරීරිකව සහ මානසිකව අභියෝග කිරීමට අවස්ථාව ලබා දෙයි. එබැවින් එලිමහන් ක්‍රියාකාරකම් අතුරින් මෙම abseiling ඉතා විශේෂ ස්ථානයක් හොබවයි.
ඉසිවරණී ජයසේකර
තොරතුරු තාක්ෂණ පීඨය
20 කණ්ඩායම